ಜೆಡಿಎಸ್ ಪಕ್ಷದ ಮುಸ್ಲಿಂ ವಿರೋಧಿ ಧೋರಣೆ ಹಾಗೂ ನಿಖಿಲ್ ಕುಮಾರಸ್ವಾಮಿ ಹೇಳಿಕೆಗೆ ತೀವ್ರ ಆಕ್ರೋಶ; , ಕಾಂಗ್ರೆಸ್ ನಾಯಕ ಇಬ್ರಾಹಿಂ ಗೋಳಿಕಟ್ಟೆ ವಾಗ್ದಾಳಿ
ಪುತ್ತೂರು: ಜನತಾ ದಳ (ಜಾತ್ಯತೀತ) ಪಕ್ಷದ ಯುವ ನಾಯಕ ನಿಖಿಲ್ ಕುಮಾರಸ್ವಾಮಿ ಅವರು ಇತ್ತೀಚೆಗೆ ಅಲ್ಪಸಂಖ್ಯಾತ ಮುಸ್ಲಿಂ ಸಮುದಾಯವನ್ನು ಗುರಿಯಾಗಿಸಿ ಸರಣಿ ಕೋಮು ಪ್ರಚೋದಿತ ಹೇಳಿಕೆಗಳನ್ನು ನೀಡುತ್ತಿರುವುದನ್ನು ಮಾಜಿ ಜೆಡಿಎಸ್ ರಾಜ್ಯ ಕಾರ್ಯದರ್ಶಿ ಹಾಗೂ ಪ್ರಸ್ತುತ ಕಾಂಗ್ರೆಸ್ ಪಕ್ಷದ ಮುಖಂಡರಾದ ಶ್ರೀ ಇಬ್ರಾಹಿಂ ಗೋಳಿಕಟ್ಟೆ ಅವರು ತೀವ್ರವಾಗಿ ಖಂಡಿಸಿದ್ದಾರೆ. ಎಸ್ಐಆರ್ (SIR) ವಿಚಾರವನ್ನು ಮುನ್ನೆಲೆಗೆ ತಂದು, "ಮುಸ್ಲಿಮರು ಬಾಂಗ್ಲಾದೇಶದಿಂದ ಬಂದು ಇಲ್ಲಿ ಅಕ್ರಮವಾಗಿ ಮತಗಳನ್ನು ಹಾಕುತ್ತಿದ್ದಾರೆ" ಎಂದು ದೇಶದ ನಿಷ್ಠಾವಂತ ನಾಗರಿಕರನ್ನು ಅನುಮಾನಿಸುವ ಮೂಲಕ ನಿಖಿಲ್ ಕುಮಾರಸ್ವಾಮಿ ಅವರು ಇಡೀ ಮುಸ್ಲಿಂ ಸಮುದಾಯಕ್ಕೆ ಅಪಮಾನ ಮಾಡಿದ್ದಾರೆ ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಎರಡು ದಶಕಗಳ ಕಾಲ ಜೆಡಿಎಸ್ನಲ್ಲಿದ್ದ ಇಬ್ರಾಹಿಂ ಗೋಳಿಕಟ್ಟೆ ಪಕ್ಷ ತೊರೆದದ್ದೇಕೆ?
ಈ ಸಂದರ್ಭದಲ್ಲಿ ತಮ್ಮ ರಾಜಕೀಯ ಇತಿಹಾಸವನ್ನು ಹಂಚಿಕೊಂಡ ಶ್ರೀ ಇಬ್ರಾಹಿಂ ಗೋಳಿಕಟ್ಟೆ ಅವರು, "ನಾನು ಸಾಧಾರಣ ಎರಡು ದಶಕಗಳ (20 ವರ್ಷ) ಸುದೀರ್ಘ ಕಾಲ ಜೆಡಿಎಸ್ ಪಕ್ಷದಲ್ಲಿ ರಾಜ್ಯ ಕಾರ್ಯದರ್ಶಿಯಾಗಿ ನಿಷ್ಠೆಯಿಂದ ಕೆಲಸ ಮಾಡಿದ್ದೇನೆ. ಆದರೆ ಜೆಡಿಎಸ್ ನಾಯಕರ ಇತ್ತೀಚಿನ ನಡವಳಿಕೆಗಳು, ಮುಸ್ಲಿಂ ವಿರೋಧಿ ಧೋರಣೆ ಹಾಗೂ ಕೃತಘ್ನತೆಯನ್ನು ನೋಡಿಯೇ ನಾನು ಮೂರು ವರ್ಷಗಳ ಹಿಂದೆಯೇ ಆ ಪಕ್ಷವನ್ನು ತ್ಯಜಿಸಿ ಹೊರಗೆ ಬಂದಿದ್ದೇನೆ. ನಾನು ಪಕ್ಷ ಬಿಡಲು ಕಾರಣವೇ ಇವರ ಇಂತಹ ದುರ್ಬುದ್ಧಿ ಮತ್ತು ವಿಷಪೂರಿತ ಹೇಳಿಕೆಗಳು. ಮುಸ್ಲಿಂ ಸಮುದಾಯದ ಮತಗಳನ್ನು ಪಡೆದು ಅಧಿಕಾರ ಅನುಭವಿಸಿದ ಇವರಲ್ಲಿ ಆ ಸಮುದಾಯದ ಬಗ್ಗೆ ಕನಿಷ್ಠ ಕರುಣೆ, ವಿನಯವಾಗಲಿ ಅಥವಾ ಕೃತಜ್ಞತೆಯಾಗಲಿ ಇಲ್ಲ. ಇವರ ಒಳಮನಸ್ಸಿನಲ್ಲಿದ್ದ ಕೋಮುವಾದಿ ಮುಖವಾಡ ಕಳಚಿಬಿದ್ದಿದ್ದರಿಂದಲೇ ನಾನು ಅಂದೇ ಜೆಡಿಎಸ್ ತೊರೆದು ಕಾಂಗ್ರೆಸ್ ಸೇರಿದ್ದೆ" ಎಂದು ಸ್ಪಷ್ಟಪಡಿಸಿದರು.
ಕುಮಾರಸ್ವಾಮಿ ಅವರ ಒಳಗಿದ್ದ ‘ಚಡ್ಡಿ’ ಈಗ ಮಗನ ರಕ್ತದಲ್ಲೂ ಎದ್ದು ಕಾಣುತ್ತಿದೆ:
ಹಿಂದಿನ ಘಟನೆಗಳನ್ನು ನೆನಪಿಸಿದ ಇಬ್ರಾಹಿಂ ಗೋಳಿಕಟ್ಟೆ ಅವರು, "ಹಿಂದೆ ನಮ್ಮ ನಾಯಕರಾದ ಶ್ರೀ ಜಮೀರ್ ಅಹಮದ್ ಖಾನ್ ಅವರು ಬಹಿರಂಗವಾಗಿಯೇ ಹೇಳಿದ್ದರು—‘ಕುಮಾರಸ್ವಾಮಿ ಅವರೇ, ನಿಮ್ಮ ಒಳಗೆ ಆರ್ಎಸ್ಎಸ್ ಚಡ್ಡಿ ಇರೋದು ನನಗೆ ಗೊತ್ತಾಗಲಿಲ್ಲ’ ಎಂದು. ಜಮೀರ್ ಅಹಮದ್ ಅಂದು ಹೇಳಿದ ಮಾತುಗಳು ಇಂದು ನೂರಕ್ಕೆ ನೂರರಷ್ಟು ನಿಜವಾಗಿವೆ. ತಂದೆಯ ಒಳಗಿದ್ದ ಅದೇ ಆರ್ಎಸ್ಎಸ್ ಸಿದ್ಧಾಂತ ಮತ್ತು ರಕ್ತದ ಗುಣ ಈಗ ಮಗನ ನಡವಳಿಕೆಯಲ್ಲೂ ಎದ್ದು ಕಾಣುತ್ತಿದೆ. ಅದಕ್ಕೇ ಇವತ್ತು ನಿಖಿಲ್ ಕುಮಾರಸ್ವಾಮಿ ಮುಸ್ಲಿಮರ ವಿರುದ್ಧ ತಿರುಗಿಬಿದ್ದು, ರಾಮನಗರವನ್ನು ‘ರಹೀಮ್ ನಗರ’ ಎಂದು ಕರೆಯುವ ಕೀಳು ಮಟ್ಟಕ್ಕೆ ಇಳಿದಿದ್ದಾರೆ" ಎಂದು ತರಾಟೆಗೆ ತೆಗೆದುಕೊಂಡರು.
"ಜೆಡಿಎಸ್ ಪಕ್ಷಕ್ಕೆ ನಿರಂತರವಾಗಿ ಮತ ಹಾಕಿ ದೇವೇಗೌಡರನ್ನು ಪ್ರಧಾನಿಯನ್ನಾಗಿ, ಕುಮಾರಸ್ವಾಮಿ ಅವರನ್ನು ಮುಖ್ಯಮಂತ್ರಿಯನ್ನಾಗಿ ಮಾಡಿದ ಮುಸ್ಲಿಂ ಸಮುದಾಯಕ್ಕೆ ಇವರು ಮಾಡುತ್ತಿರುವ ದ್ರೋಹ ಅಕ್ಷಮ್ಯ. ನಿಖಿಲ್ ಕುಮಾರಸ್ವಾಮಿ ಅವರ ಇಂದಿನ ಮಾತುಗಳು ಮತ್ತು ವರ್ತನೆಯನ್ನು ನೋಡಿದರೆ, ಅವರು ಜಾತ್ಯತೀತ ಪಕ್ಷದ ನಾಯಕನಾಗಿ ಇರುವುದಕ್ಕಿಂತ ಬಜರಂಗದಳದ ಅಧ್ಯಕ್ಷರಾಗುವುದು ಒಳಿತು ಎಂಬುದು ನಮ್ಮ ಸ್ಪಷ್ಟ ಅಭಿಪ್ರಾಯವಾಗಿದೆ" ಎಂದು ಇಬ್ರಾಹಿಂ ಗೋಳಿಕಟ್ಟೆ ಲೇವಡಿ ಮಾಡಿದರು.
ಮುಸ್ಲಿಂ ಬಾಂಧವರೇ, ಇದು ಚಿಂತಿಸುವ ಸಮಯ:
ಜೆಡಿಎಸ್ ನಾಯಕರ ಇಂತಹ ಮಾರಕ ಮತ್ತು ದ್ವೇಷದ ಹೇಳಿಕೆಗಳನ್ನು ನೋಡಿದ ಮೇಲಾದರೂ ಮುಸ್ಲಿಂ ಸಮುದಾಯವು ಈಗ ಗಂಭೀರವಾಗಿ ಚಿಂತಿಸಬೇಕಾದ ಪರಿಸ್ಥಿತಿ ಬಂದೊದಗಿದೆ. ಮುಸ್ಲಿಂ ಸಮುದಾಯವನ್ನು ಕೇವಲ ವೋಟ್ ಬ್ಯಾಂಕ್ ಆಗಿ ಬಳಸಿ, ಅಧಿಕಾರ ಸಿಕ್ಕಾಗ ಕೋಮುವಾದಿ ಶಕ್ತಿಗಳ ಮಡಿಲು ಸೇರುವ ಇಂತಹ ನಾಯಕರನ್ನು ಇನ್ನು ಮುಂದೆ ನಂಬಲು ಸಾಧ್ಯವೇ ಇಲ್ಲ. ಸರ್ವ ಜನಾಂಗದ ಶಾಂತಿಯ ತೋಟವಾಗಿರುವ ಕರ್ನಾಟಕದಲ್ಲಿ ಕಾಂಗ್ರೆಸ್ ಪಕ್ಷ ಮಾತ್ರವೇ ಎಲ್ಲ ಸಮುದಾಯಗಳಿಗೆ ನಿಜವಾದ ರಕ್ಷಣೆ ನೀಡಲು ಸಾಧ್ಯ ಎಂದು ಅವರು ಪ್ರತಿಪಾದಿಸಿದರು.
ತಮ್ಮ ರಾಜಕೀಯ ಸ್ವಾರ್ಥಕ್ಕಾಗಿ ದೇಶದ ನಾಗರಿಕರ ದೇಶಭಕ್ತಿಯನ್ನು ಪ್ರಶ್ನಿಸಿದ ನಿಖಿಲ್ ಕುಮಾರಸ್ವಾಮಿ ಅವರು ತಕ್ಷಣವೇ ಸಮುದಾಯದ ಕ್ಷಮೆಯಾಚಿಸಬೇಕು. ಸಮಾಜದಲ್ಲಿ ಶಾಂತಿ ಕದಡುವ ಇಂತಹ ರಾಜಕಾರಣವನ್ನು ನಿಲ್ಲಿಸದಿದ್ದರೆ, ಮುಂಬರುವ ದಿನಗಳಲ್ಲಿ ಅಲ್ಪಸಂಖ್ಯಾತರು ಒಗ್ಗಟ್ಟಾಗಿ ಜೆಡಿಎಸ್ ಪಕ್ಷಕ್ಕೆ ತಕ್ಕ ಪಾಠ ಕಲಿಸಲಿದ್ದಾರೆ ಎಂದು ಕಾಂಗ್ರೆಸ್ ನಾಯಕರಾದ ಶ್ರೀ ಇಬ್ರಾಹಿಂ ಗೋಳಿಕಟ್ಟೆ ಅವರು ಈ ಪತ್ರಿಕಾ ಪ್ರಕಟಣೆಯ ಮೂಲಕ ತೀಕ್ಷ್ಣವಾಗಿ ಎಚ್ಚರಿಸಿದ್ದಾರೆ.
